Кыргызстан БУУнун Статистикалык комиссиясынын 56-сессиясында статистиканы өнүктүрүү боюнча глобалдык демилгелерге активдүү катышууда
Басылмалардын датасы: 17.03.2025
Кыргыз Республикасынын Улуттук статистика комитетинин төрагасы Бактыбек Кудайбергенов Нью-Йоркто өткөн БУУнун Статистикалык комиссиясынын 56-сессиясына катышты. Сессиянын талкуу борборунда статистиканы модернизациялоого, маалыматтардын сапатын жогорулатууга жана алардын туруктуу өнүктүрүүдөгү ролуна тиешелүү негизги маселелер болду.
Сессия "Мыкты маалыматтар — мыкты жашоо" деген ураандын алкагында өтүп, 2025-жылы жаңыланган Улуттук эсеп тутумун (УЭТ) киргизүү сыяктуу маанилүү темаларды камтыды. Төрага Бактыбек Кудайбергенов өз сөзүндө УЭТ-2025ти киргизүүнү толугу менен колдоп, бул процесстин Кыргызстанда улуттук эсептөө тутумун тез адаптациялоого чоң таасир тийгизерин белгиледи. Ал ошондой эле УЭТ-2025ти киргизүү боюнча колдонмону иштеп чыгуу зарылдыгын баса белгиледи, бул жаңы стандарттардын улуттук статистикага ийгиликтүү интеграцияланышын камсыз кылат.
Өзгөчө эмгек статистикасына көңүл бурулду. Бул чакырыктарга жооп катары Улутстатком эл аралык стандарттарга ылайык келген жана эмгек рыногундагы кырдаалды, анын ичинде эмгек ресурстарынын миграциясын жана социалдык кам көрүү маселелерин так талдоого мүмкүндүк берген жумушчу күчүн изилдөө үчүн жаңы суроолор тизмегин иштеп чыкты.
Мындан тышкары, Төрага Бактыбек Кудайбергенов эл аралык өнөктөштөр менен эки тараптуу бир катар натыйжалуу жолугушууларды өткөрдү:
-
Корея Республикасынын Статистика башкармалыгынын комиссары менен беш жыл аралыгында гранттык негизде алдын ала бюджети 5,5 млн АКШ доллары менен Кыргызстандын статистикалык потенциалын жогорулатуу боюнча долбоорду ишке ашырууну, ошондой эле эки улуттук статистикалык системанын узак мөөнөттүү кызматташуусу жөнүндө Меморандумга кол коюунун келечегин талкуулашты.
-
БУУнун Азия жана Тынч океан үчүн экономикалык жана социалдык комиссиясынын (ЭСКАТО) жетекчилиги менен Улуттук статистика системасын өркүндөтүүдө Кыргызстанды техникалык жактан колдоо механизмдери каралган жана УЭТ-2025 сунуштамаларын киргизүү боюнча кызматташуу пландаштырылды.
-
КМШнын Статкомитетинин төрагасы менен шериктештик мейкиндигинде статистикалык стандарттарды координациялоо маселелери, ошондой эле Кыргызстандын статистикалык системасынын 100 жылдыгына арналган иш-чараларды өткөрүү боюнча даярдык иштеринин алкагында кызматташуунун жолдору талкууланды.
-
Сербиянын статистикалык кеңсесинин төрагасы менен маалыматтарды чогултуу тутумун санариптештирүү жана электрондук отчеттуулукка өтүү үчүн IST программасын киргизүү жаатында кызматташуу жөнүндө талкуу жүргүзүлүп, ошондой эле жетекчилер узак мөөнөттүү кызматташуу маселесин көтөрүштү.
БУУнун Статистикалык комиссиясынын 56-сессиясы Кыргызстандын эл аралык статистикадагы позициясын бекемдөө үчүн маанилүү кадам болуп калды. Ийгиликтүү жана натыйжалуу макулдашуулар экономикалык жана социалдык стратегияларды түзүү үчүн Улуттук статистика системасын өркүндөтүү жана маалыматтардын сапатын жогорулатуу үчүн жаңы мүмкүнчүлүктөрдү ачат.
